Иван Тодев, познат како Белјан Чауш, е роден во селото Смол, Гевгелиско, во 1877 година.
Припаѓал на струмичката револуционерна интелигенција која произлегла од средината на револуционерните кружоци создадени под влијание на Гоце Делчев. Во таа средина ги стекнал своите револуционерни убедувања и ја разбрал задачата на еден револуционер.
На почетокот извршувал терористички задачи по наредба на Организацијата. По заповед на Окружниот комитет ликвидирал еден озлогласен агент на османлиската власт по име Белјал Чауш, по што останал познат под прекарот Белјан Чауш.
Подоцна станал војвода во Горноџумајско, а од 1905 година бил назначен за струмички околиски војвода на ВМОРО.
На 2 јуни 1905 година, во близина на селото Едрениково, Струмичко, неговата чета од деветмина борци била предадена на османлиските власти и опколена од бројна војска. По целодневна жестока борба и неуспешен обид за пробив, загинале војводата Иван Тодев – Белјан Чауш и тројца негови четници.
Белјан Чауш останал запаметен како еден од истакнатите струмички војводи и борци на ВМОРО, кој својот живот го положил во борбата за слободата на Македонија.