Роден е во 1872 година во селото Екши Су, Леринско.
Во редовите на ТМОРО се вклучил уште како млад, најнапред како четник, а подоцна и како војвода. За време на Илинденското востание, со својата чета зел активно учество во борбите во Леринско.
По востанието учествувал во обновувањето на револуционерната мрежа во својот реон и влегол во новиот состав на Леринското Горско началство.
Кон крајот на 1904 година, во селото Ајтос, Леринско, бил предаден од шпионот Митре Гинков. Бил заробен и одведен во битолскиот истражен затвор, каде бил подложен на тешки измачувања и држен цела година.
Турскиот суд во Битола го осудил на смрт. Казната била извршена со јавно бесење на битолскиот Ат-Пазар, на 29 август 1905 година.
Александар Турунџев останал запаметен како еден од истакнатите лерински војводи и борци за слободата на Македонија.