Роден е на 18 март 1877 година во Кукуш. Се школувал во родниот град, а потоа до VI клас во Солунската егзархиска гимназија. Таму се вклучил во редовите на ВМОРО, покрстен од Стефан Танчев.
Со помош на Ѓорче Петров, од 1898 година учителствувал во Лешко, каде што покрај учителската работа дејствувал на зајакнување на револуционерната мрежа и на организирање на каналите за пренос на оружје од Бугарија во Македонија.
Во 1899 година учителствувал во Долни Порој и бил назначен за реонски раководител на ВМОРО за Поројско. Во 1900 година работел како учител во селото Цапарево, а од септември 1901 година бил учител во Крушево. Поради прогон од османлиските власти, во ноември истата година преминал во илегала.
Во почетокот на 1902 година станал секретар во четата на Андон Тешовалијата и дејствувал во Неврокопско и Разлошко.
Во јануари 1903 година, заедно со четата на Гоце Делчев, повторно влегол во Македонија. Потоа дејствувал во Струмичко со мала чета и зел учество во подготовките и борбите за време на Илинденското востание.
По револуционерната дејност се посветил на образованието и во 1907 година завршил стоматологија во Виена. Потоа се населил во Подгорица, Црна Гора, каде што работел како стоматолог до крајот на животот.
Умрел во Подгорица на 19 септември 1943 година.