Мишо Шкатров е роден на 14 февруари 1884 година во Кавадарци.
По завршувањето на основното образование во родниот град, се школувал во Солунската машка гимназија, каде што се приклучил кон редовите на ВМОРО.
По завршувањето на образованието учителствувал во селото Долни Порој, Серско, а подоцна и во Кавадарци.
Во 1904 година станал член на Тиквешкиот околиски револуционерен комитет, а од октомври истата година бил секретар во четата на Димитар Даскалов.
Во периодот од 1905 до 1908 година дејствувал во четите на Христо Чернопеев и Јане Сандански. Во исто време бил еден од основачите на Народната федеративна партија.
По Младотурската револуција во 1908 година бил назначен за училишен инспектор во Тиквешко. По младотурскиот контраудар учествувал во походот кон Цариград.
Во 1912 година бил војвода во Велешко, а во 1913 година учествувал во Тиквешкото востание. Учествувал и во Првата светска војна.
По завршувањето на војната бил член на Привременото претставништво на ВМРО и еден од потписниците на заедничкиот апел од 6 март 1919 година за обединување на различните струи во македонското револуционерно движење.
Во 1921 година повторно се вклучил во редовите на ВМРО и станал окружен војвода во Солунскиот револуционерен округ.
По убиството на генерал Александар Протогеров застанал на страната на протогеровистите. Како приврзаник на федералистичката идеја, подоцна станал член на ВМРО (Обединета), а во 1930 година бил избран во нејзиниот Централен комитет.
Починал на 25 јуни 1936 година во Софија.