Михаил Николов Розов е роден на 25 август 1874 година во селото Бобишта (денес Верга), Костурско. Бил брат на револуционерот Манол Розов.
Основното образование го стекнал во Костур, а потоа се школувал во Солунската машка гимназија, каде што се приклучил кон редовите на ВМОРО. По завршувањето на гимназиското образование студирал неколку семестри филозофија на Загрепскиот универзитет.
Во 1896 година бил учител во Дојран, во 1898 година во Воден, а во периодот 1899–1902 година бил директор на Костурската гимназија.
Од 1900 до 1902 година бил раководител и благајник на Костурскиот револуционерен реон. По Јосифовата афера, во септември 1902 година бил уапсен од турските власти и затворен во Корча, каде останал до февруари 1903 година, кога бил ослободен со амнестија.
Во мај 1903 година учествувал на Смилевскиот конгрес, каде бил избран за член на Горското началство на Костурскиот револуционерен реон, заедно со Лазар Поп Трајков, Манол Розов, Павел Кљашев и Васил Чакаларов.
За време на Илинденското востание, во Костурско, учествувал во организирањето на голема востаничка чета составена од околу 650 борци. Со неа преку Леринско, Мариово и Прилепско се упатил кон Тиквешко, каде што востаничкото движење било послабо развиено. Подоцна се вратил во Костурско со околу 400 востаници, по што четата била распуштена.
По востанието, како претставник на ВМОРО, учествувал во разговори со српски претставници во Белград.
Учествувал во Балканските војни и во Првата светска војна.
По завршувањето на војната се населил во Варна, каде работел како финансиски службеник. Активно учествувал во работата на Илинденската организација и помагал во издавањето на „Алманах Македонија“.
Починал на 1 август 1935 година во Варна.