Родена е во 1901 година во Тетово. Основното и прогимназијалното образование го стекнала во родниот град, а потоа завршила стопанско училиште во Скопје.
За време на Првата светска војна, заедно со својот татко заминала во Бугарија. Таму живеел и нејзиниот брат Борис, кај кого Мара останала извесно време. Наскоро се запознала со коњичкиот офицер Иван Хранков од Русе и станала негова сопруга.
Огорчена од постапките на српската управа и од физичките и моралните мачења на кои биле изложени затворените македонски студенти, Мара Бунева, како активен член на ВМРО, решила да го казни Велимир Прелиќ, човекот кој ја водел истрагата против родољубивите македонски студенти.
По извесен престој во Тетово, се населила во Скопје. На 13 јануари 1928 година, во 12:15 часот, во Скопје со три куршуми го погодила Велимир Прелиќ, по што посегнала по сопствениот живот. Тешко ранета, била пренесена во болница, каде што подоцна починала.
По настанот, полицијата извршила претрес во нејзиниот дом и спровела масовни апсења. Бил затворен нејзиниот татко, а исчезнал и нејзиниот брат Лазар. Во Тетово бил убиен и нејзиниот братучед Борис Андрејчин, млад адвокат. На прогон биле изложени и други членови на семејството, пријатели и граѓани.
Се претпоставува дека Мара Бунева била погребана на скопските гробишта без свештеник и без опело.