Кај народот бил познат како Апостол војвода и „Ениџевардарско сонце“.
Роден е во 1869 година во селото Бојмица, Гевгелиско. Уште пред појавата на ТМОРО бил војвода на комитска чета, а со создавањето на Македонската револуционерна организација се приклучил кон нејзините редови.
Се стекнал со голем авторитет меѓу населението, бил многу сакан од селаните и се сметал за нивен заштитник.
За време на Илинденското востание бил предводник на голема востаничка чета и со неа водел успешни борби против турската војска. По востанието се борел против грчката вооружена пропаганда, а главен центар на неговата активност било Ениџевардарското Езеро и околните мочуришта.
По Младотурската револуција во 1908 година се легализирал и заминал во Бугарија. Во 1910 година повторно се вратил во Македонија со своја чета.
Убиен е во заседа на 2 август 1911 година, во близина на селото Крушари, Ениџевардарско.
Апостол Петков Терзиев останал запаметен како еден од најпознатите и најомилените војводи на Македонската револуционерна организација.